Украина Президенти Владимир Зеленский якшанба куни халққа қилган кундалик мурожаати чоғида КХДР Россия қўшинларини қўллаб-қувватлаш учун қурол-яроқ ва аскар юбораётганини айтган. У мамлакатнинг ғарблик ҳамкорлар билан муносабатини янада чуқурлаштириш, қарама-қарши томонларга шу орқали босим ўтказиш кераклигини ҳам қўшимча қилган.

– Украина учун оддий ҳарбий аслаҳа эмас, кўпроқ узоқ масофага мўлжалланган қурол-яроқ зарур, – деди етакчи. – Бу Россия бардош бера оладиганидан-да, кучлироқ бўлади. Натижада каттароқ урушнинг олди олинади.  

Украина раҳбари ўзининг “ғалаба режаси” тинчликни кафолатлаш ва урушни тугатиш учун мос келадиган шартлардан иборат экани ва мамлакат мақсадини амалга оширишда давом этишини билдирди.  

Маълумки, КХДР етакчиси Ким Чен Ин Владимир Путиннинг асосий иттифоқчиларидан бирига айланган. Шимолий Корея Россия қўшинларини қўллаб-қувватлаш учун аскарларини юбораётгани ҳақидаги даъво илк бор 11 октябрь куни янгради. Ўша куни Киев ва Сеулдаги юқори мартабали амалдорлар Шимолий Корея ҳарбий муҳандисларини Украинани баллистик ракеталар билан нишонга олиш учун Россияни қўллаб-қувватлашга жўнатаётганини эълон қилди. ОАВ хабарида, ҳатто, КХДР қўшинларининг бир қисми ҳозир ҳам Украинада жанг қилаётгани айтилган.

Кремль бу даъволарни рад этди, давлат раҳбари матбуот котиби Дмитрий Песков Москвада журналистларга “Бу яна бир сохта хабар”, деди.  

Вашингтон даъво қилишича, Пхеньян Россияга ўқ-дори юкланган 16 мингдан ортиқ юк контейнерини жўнатган.