“АҚШ президенти ушбу хат ҳақида гапирганда аввалги мактубларни назарда тутганми, буниси бизга қоронғу, лекин сўнгги пайтларда олий раҳбариятимиздан Дональд Трампга ҳеч қандай мактуб йўллангани йўқ“, — дейилади Шимолий Корея марказий телеграф агентлиги орқали тарқатилган хабарда.

Куни кеча Оқ уй раҳбари Дональд Трамп Шимолий Корея лидери Ким Чен Ин билан муносабатлари ҳали ҳам яхши эканини таъкидлаб, яқинда ундан ажойиб хат олганини маълум қилганди.

“Шимолий Корея яқинда қисқа масофага учадиган ракета синовини амалга оширди. Шу билан бирга, мен Ким Чен Индан ажойиб мактуб олдим. Ўйлашимча, у билан муносабатларимиз жуда яхши “, — деди у Вашингтонда уюштирилган матбуот анжуманида журналистларга.