Россия хавфсизлик хизмати Шимолий Кавказда террорчилик ҳужумлари уюштирган шахсларга нисбатан тергов олиб бораётган эди.

Суриштирув давомида полиция қўпорувчилик ҳаракатларида айбланган, жангарилар гуруҳи аъзолари, дея гумон қилинган 19 эркакни ҳибсга олган. Бу ҳақда Федерал хавфсизлик хизмати баёнот берди.

Икки кун муқаддам гумонланувчи шахсларнинг яшаш жойида тинтув ўтказилди, уларнинг хуфиёна учрашувлари ҳақидаги маълумотлар очиқланди. Шундан сўнг ҳукумат жангарилар қамоққа олинганини эълон қилди.

Маълум бўлишича, суриштирув чоғида пулемёт, автомат, милтиқ ва 40 дан ортиқ экстремистик хусусиятга эга материал топилган ва мусодара қилинган. Бундан ташқари, 3 килограммдан ортиқ тротил моддали қўлбола портловчи мослама ҳам топилган.

Ҳибсга олинган шахслар Россияда 2010 йилдан бери тақиқланган Такфир вал-Ҳижра (Aнатема ва сургун) гуруҳи аъзолари экани айтилмоқда.