Баъзида эътиборсизлигимиз туфайли турли касалликларни орттириб оламиз. Касалимиз енгил бўлсаку хўп-хўп, нари борса, шифокорнинг битта консултацияси-ю, муолажаларидан сўнг тузалиб, оёққа туриб кетамиз.

Аммо орамизда оғир ташхисли, мураккаб касалликка дучор бўлган, йил аро операция столида ётиб, кунларини шифтга термулиб ўтказаётган инсонлар ҳам бор. Улар ҳақида эшитганимизда қўлимиздан келса моддий кўмак берамиз. Келмаса ачинишдан бошқасига ярамаймиз.  

Қувонарлиси шундаки, бугун давлатимиз томонидан ҳар бир инсоннинг тақдири, келажагига эътибор билан қаралмоқда. Айниқса, кам таъминланган, ногиронлиги бор, боқувчисини йўқотган  шахсларнинг мураккаб операциялари  бепул амалга ошириб берилмоқда.  

Сурхондарё вилояти, Узун тумани, Янги рўзғор маҳалла фуқаролар йиғинига қарашли Иттифоқ кўчасида яшовчи Мафтуна Ниязова ҳам бир неча йиллардан буён операция столига қайта-қайта ётишига тўғри келди. У оёқларидаги оғриқ  туфайли охир-оқибат юролмай қолди. Унга  икки томонлама “коксартроз” ташхиси қўйилган. Мафтунанинг халқ қабулхонасига қилган мурожаати беиз кетмади. Куни кеча Республика ихтисослаштирилган травматология ва ортопедия илмий-амалий тиббиёт марказида у бепул операция қилинди.  

<iframe width="860" height="484" src="https://www.youtube.com/embed/q1_ZWi65Pck" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Нигора Раҳмонова, Ёқуб Мелибоев (видео), ЎзА