Markaziy saylov komissiyasi a’zosi Sherzodxon Qudratxo‘jayev O‘zbekiston Respublikasi Prezidenti saylovini o‘tkazuvchi 9-Surxondaryo okrug saylov komissiyasida bo‘lib, bu yerda yaratilgan sharoitlar bilan tanishdi.

Okrug hududida joriy yilning 24 oktyabr kuni bo‘lib o‘tadigan O‘zbekiston Respublikasi Prezidenti sayloviga puhta hozirlik ko‘rilmoqda.

Milliy qonunchiligimizga ko‘ra, viloyatda tashkil etilgan 860 ta saylov uchastkasida muhim bu jarayonni ochiq va umume’tirof etilgan tamoyillar asosida o‘tkazish uchun barcha ishlar belgilangan kalendar-reja asosida olib borilmoqda. Shunga muvofiq saylov uchastkalari Saylov kodeksi asosida jihozlanib, saylovchilarga qulay sharoit yaratilayotir. Uchastka saylov komissiyalari a’zolari uyma-uy yurib, saylovchilarning yagona elektron ro‘yxatiga kiritilgan fuqarolarni xatlovdan o‘tkazish ishlarini yakunlamoqda. Muddatidan oldin ovoz berish jarayoniga ham qizg‘in tayyorgarlik ko‘rilayotir.

Okrug saylov komissiyasi a’zolari mavjud saylov uchastkalarida amalga oshirilayotgan ishlarni o‘rganib, ularga yaqindan ko‘maklashmoqda. Aniqlangan kamchiliklarni joyida hal etish choralarini ko‘rayotir.

Sherzodxon Qudratxo‘jayev okrug saylov komissiyasi a’zolarining yig‘ilishlar zalini ko‘zdan kechirdi. Komissiya a’zolari xonasida bo‘lib, ular bilan suhbatlashdi. Matbuot markazi faoliyati, mahalliy va xorijlik jurnalistlarga yaratilgan sharoitlar bilan yaqindan tanishdi. Saylovni umume’tirof etilgan tamoyillar asosida ochiq, oshkora va shaffof o‘tkazish yuzasidan taklif va tavsiyalarini bildirdi.

Xolmo‘min MAMATRAYIMOV,O‘zA