Шахрисабз әуежайы 2003 жылдың қараша айында жабылған болатын. Содан бері әуежайға рейстер шамамен 21 жылдан кейін қайта жандандырылды.

Uzbekistan Airports хабарлауынша, Silk Avia әуе компаниясының Ташкенттен алғашқы рейсі жергілікті уақытпен сағат 13:10-де әуежайға қонды. Рейстің ұзақтығы 1 сағат 30 минутты құрады.

Ұшақ су аркасымен, ал алғашқы жолаушылар болса, арнайы салтанатты түрде қарсы алынды. 

Шахрисабздан 5 км оңтүстік-батыста орналасқан бұл әуежай 1983 жылы ашылған. 1983-1996 жылдар аралығында Ташкент-Шахрисабз бағыты бойынша жаз айларында апта сайын 4 рет, күз-қыс маусымында 3 рет ұшулар орындалды, сонымен қатар Үргеніш-Шахрисабз бағыты бойынша да апта сайын екі рет ұшулар жүзеге асырылды.

Қазіргі таңда әуежай азаматтық авиация рейстеріне қызмет көрсету мүмкіндігіне ие. Ұзындығы 1554 м және ені 35 м болатын ұшу-қону жолағы, екі ұшақ және төрт тікұшақ тұратын алаңы бар әуежай АТР-42, АТР-72, Л-410 және барлық түрдегі тікұшақтарды қабылдай алады. Әуежай кешені сағатына 100 жолаушыға қызмет көрсету мүмкіндігіне ие.