Ҳиндистоннинг Гоа шаҳрида шахмат бўйича давом этаётган жаҳон кубоги мусобақаларининг иккинчи босқич 2-тур ўйинлари тай-брек баҳсларида ҳамюртимиз Нодирбек Абдусатторов қозоғистонлик Денис Махневни, Шамсиддин Воҳидов испаниялик Максим Чигаевни мағлуб этиб, бир кун муқаддам 3-босқичга йўл олган Жавоҳир Синдоров ва Нодирбек Ёқуббоев қаторига қўшилди.

Бугун, 7 ноябрь куни жаҳон кубогининг 3-босқичида 32 та жуфтлик кейинги босқичга чиқиш йўлидаги илк ўйинларда рўбарў келади.

Улар қаторидан жой олган ҳамюртларимиз Шамсиддин Воҳидов ҳиндистонлик Аржун Эригаиси билан баҳсларга киришса, Нодирбек Абдусатторов мексикалик Хосе Мартинез қаршилигини енгишга ҳаракат қилади. Шунингдек, Жавоҳир Синдоров германиялик Николас Теодору билан, Нодирбек Ёқуббоев Чехия шарафини ҳимоя қилаётган Ван Нгуен билан куч синашади.

Эслатиб ўтамиз, жаҳон кубоги дастурига мувофиқ бугун ва эртага 3-босқичнинг 1 ва 2-тур ўйинлари ўтказилади.

Мукофот жамғармаси 2 миллион АҚШ долларидан иборат жаҳон кубоги 26 ноябрга қадар давом этади.

Т.Рўзиев,

ЎзА