Чехиянинг Прага шаҳрида давом этаётган “Prague International Chess Festival 2026” халқаро турнирининг “Masters” гуруҳида ўтказилган 1-тур ўйинларида Нодирбек Абдусатторов ва Нодирбек Ёқуббоев рақибларини мағлуб этди.

Кеча якунланган 1-турда Нодирбек Абдусатторов ҳиндистонлик Аравиндх Читамбарамни, Нодирбек Ёқуббоев испаниялик Антон Давидни таслим этиб, 1 очко жамғарган ҳолда қўшимча кўрсаткичларга кўра, турнир жадвалининг биринчи ва учинчи ўринларини банд этиб турибди.

Ортда қолган дастлабки турда шунингдек, нидерландиялик Жорден ван Форест Германия вакили Винсент Кеймерни, Чехия терма жамоаси аъзоси Давид Навара эронлик Пархам Магсудлуни доғда қолдирди.

Бугун, 26 февраль куни халқаро турнирнинг 2-турида Нодирбек Абдусатторов қора доналарда Пархам Магсудлу билан, Нодирбек Ёқуббоев ҳам қора доналарда амалдаги жаҳон чемпиони Гукеш Доммаражу билан тўқнаш келади.

Шу ўринда айтиш лозим, ФИДЕ рейтингининг кучли ўнлигидан жой олган 10 нафар шахматчидан 3 нафари Прага турнирида иштирок этмоқда.

Кеча ўтказилган илк турда Абдусатторов ҳиндистонлик Аравиндх Читамбарамдан устун келиши ҳамда Винсент Кеймернинг ван Форестга ўйинни бой бериши натижасида Нодирбек ФИДЕ рейтингида кучли тўртликка кўтарилди. Германия вакили 5-поғонага тушиб кетди.

9 та турдан иборат Прага турнири 6 мартга қадар давом этади.

Т.Рўзиев, ЎзА