Ҳиндистоннинг Гоа шаҳрида дунё шахмат ишқибозларининг эътибор марказида бўлган жаҳон кубогининг 1/4 финал баҳсларида 8 нафар шахматчи иштирок этмоқда.

Жаҳон кубогининг дастлабки босқичида 208 нафар шахматчи қатнашган бўлса, финал остонасидаги баҳсларга етиб келган Ҳиндистон, АҚШ, Хитой, Мексика, Германия вакиллари қаторида Ўзбекистоннинг икки нафар шахматчиси иштирок этаётгани барчамизга чексиз ифтихор бағишламоқда.

Мукофот жамғармаси 2 миллион АҚШ долларидан иборат мусобақанинг 1/4 финалида ҳамюртларимиз Жавоҳир Синдоров мексикалик Хосе Эдуардо Мартинесга рўбарў келган бўлса, Нодирбек Ёқуббоев Германия вакили Александр Донченко билан куч синашмоқда.

Кеча 1/4 финалнинг 1-турида ўтказилган 4 та жуфтликнинг биттасида, яъни Нодирбек Ёқуббоев – Александр Донченко қарама-қаршилигидаги ўйинда ғалаба қайд этилди.

Айтиш лозим, оқ доналарда ҳаракатланган Ёқуббоев илк юришларданоқ муваффақият эшикларини ўзи томонга очилишига шароит яратди. Ортда қолган турларда нидерландиялик Аниш Гири, германиялик Маттиас Блюбаум, вьетнамлик Ле Куанг Льем сингари кучлиларни жаҳон кубогидан чиқариб юборган Донченко 1/4 финалининг илк турида Ёқуббоевдан мағлубиятга учради.

1/4 финалнинг илк турида Жавоҳир Синдоров кубок баҳсларининг ўтган турларида ҳамюртимиз Нодирбек Абдусатторов, асли россиялик, ҳозирда Сербия шарафини ҳимоя қилаётган Алексей Сарана ва ҳиндистонлик Пентала Харикришна каби маҳоратлиларни доғда қолдирган мексикалик Хосе Мартинез билан оқ доналарда дурангга эришди.

Худди шунингдек, ушбу босқичнинг 1-турида Вэй И Аржун Эригаиси ва Сэм Шенкленд Андрей Есипенко қарама қаршилигидаги баҳсларда муроса йўли танланди.

Бугун, 18 ноябрь куни жаҳон кубоги 6-босқич ўйинларининг 2-тур мусобақалари ташкил этилади. Унда ҳамюртларимиз рақибларига қора доналарда қаршилик кўрсатади.

Мазкур турда Н.Ёқуббоевни дуранг натижа ҳам ярим финалга олиб чиқса, Синдоровга баҳсни тай-бреккача олиб бормаслик учун ғалаба керак бўлади.

Воқеалар ривожидан олдинга ўтиб фикр юритадиган бўлсак, ушбу босқичда маҳоратли шахматчиларимиз ғалабага эришса, улар ярим финалда дуч келади.

Хўш, Синдоров – Ёқуббоев “дуэли” бу йилги жаҳон кубогида рўй берармикан? Агарки ушбу ҳолат ҳақиқатга айланса, бу, халқаро шахмат оламида Ўзбекистон спортининг яна бир тарихий ва ўзига хос оламшумул кўрсаткичи сифатида эътироф этилиши шубҳасиз.

Эслатиб ўтамиз, Жаҳон кубогининг ярим финал ўйинлари 21-23 ноябрда, финал баҳслари 24-26 ноябрь кунлари ўтказилади.

Мазкур жаҳон кубогида совринли ўринларни эгаллаган 3 нафар шахматчи 2026 йилги жаҳон чемпионатининг номзодлар турнирида қатнашиш ҳуқуқини қўлга киритади.

Тўлқин Рўзиев, ЎзА