Namanganda Bosh prokuratura huzuridagi Majburiy ijro byurosi viloyat boshqarmasi, shahar va tumanlar bo‘limlari xodimlari o‘rtasida sog‘lom turmush tarzini keng targ‘ib etish borasida turli sport musobaqalari tashkil etilmoqda.

"Sportni sev, sport bilan yasha" shiori ostida Namangan shahridagi 1-sonli bolalar-o‘smirlar sport maktabi bilan hamkorlikda o‘tkazilgan navbatdagi musobaqada bu gal xodimlar shaxmat turi bo‘yicha "Boshqarma boshlig‘i sovrini" uchun o‘zaro dona surdilar.

O‘zbekiston Respublikasi Prezidentining 2021 yil 14 yanvardagi “Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to‘g‘risida”gi qarori ijrosini ta’minlash maqsadida o‘tkazilgan musobaqa yigirmaga yaqin xodim ishtirok etdi.

O‘ziga xos “aql-idrok” bahslari yakunlariga ko‘ra, Byuroning viloyat boshqarmasi tumanlararo bo‘limi davlat ijrochisi Bekzod Mirzayev musobaqa g‘olibligini qo‘lga kiritdi. Ikkinchi o‘rin MIB Namangan shahar bo‘limi davlat ijrochisi Dilmurod To‘xtaboyev, uchinchi o‘rin esa boshqarma inspektori Dilyaver Shexometovga nasib etdi.

Musobaqa yakunida g‘olib va sovrindorlar diplom, qimmatbaho sovg‘alar bilan taqdirlandilar.

Oqilxon Dadaboyev, O‘zA