«Prague International Chess Festival-2024» турнири жаҳон шахмат ишқибозлари эътиборини Чехия пойтахти Прагага қаратган.
Дунёнинг энг кучли 10 нафар шахматчиси иштирок этаётган “Мастерс” баҳсларининг ортда қолган 4-тур якунларига кўра, ҳамюртимиз Нoдирбек Абдусатторов ва эронлик Парҳам Магсудлу 3 очко жамғарган ҳолда пешқадамлик қилмоқда.
Кеча турнирнинг 4-тур мусобақасида Абдусатторов-Гукеш учрашувидагидек Давид Наварра – Парҳам Магсудлу баҳсида ҳам дуранг натижа қайд этилди. 4-турнинг қолган қарама-қаршилигидаги Ричард Раппорт – Винсент Каймер-0,5:0,5, Нгуен Тай Дай Ван – Праггнанандхаа-0,5:0,5, Сантош Гуджрати Видит – Матеуш Бартель-0,5:0,5 “дуэл”ларида ҳам муроса йўли танланди.
Шу тариқа 5-тур олдидан Абдусатторов ва Магсудлу 3 очко билан етакчилик қилаётган бўлса, улардан кейинги ўринларда 2,5 очкога эга Гукеш ва Ричард Раппорт, 2 очколи Сантош Гуджрати Видит, 1,5 очко жамғарган Винсент Каймер, Нгуен Тай Дай Ван, Праггнанандхаа, Наварра ва 1 очкога эга Матеуш Бартель бормоқда.
Бугун, 2 март куни халқаро турнирнинг “Мастерс” мусобақалари 5-турида Нодирбек Абдусатторов қора доналарда Матеуш Бартель билан кураш олиб боради. Парҳам Магсудлу эса оқ доналарда Ричард Раппортга қарши дона суради.
Шунингдек, 5-турда Гукеш- Давид Наварра, Праггнанандхаа- Сантош Гуджрати Видит, Винсент Каймер- Нгуен Тай Дай Ван учрашувлари ташкил этилади.
Айтиш лозим, учрашувлар шу зайлда давом этиб Абдусатторов ва Магсудлу етакчиликни сақлаб қола билса, 6 март куни турнирнинг 8-турида ҳар иккаласи рўбарў келиши ғолибликка айнан ким кўпроқ муносиб эканлигини аниқлаб беради.
Бироқ, 64 катакли шахмат майдонида кутилган ва кутилмаган ҳолатлар рўй беришидан келиб чиқсак, "Prague International Chess Festival-2024" баҳсларининг “об-хавоси” кутилмаганда ўзгариб кетиши эҳтимолдан йироқ эмас.
Вазият қандай ва қай тарзда кечишидан қатъий назар Прага мусобақаларида Абдусатторовга омад тилаймиз.
Тўлқин Рўзиев, ЎзА