АҚШнинг Сент-Луис шаҳрида шахмат бўйича ўтаётган "Sinquefield Cup-2024" турнирининг 1-турида Нодирбек Абдусатторов қора доналарда ҳиндистонлик Рамешбабу Прагнанандха билан муроса йўлини танлади.

Биринчи тур баҳсларининг тўрттасида дуранг қайд этилди. Франциялик Алиреза Фирузжа ва АҚШ вакили Фабиано Каруана учрашувида ғолиб аниқланди. Қора доналарда ҳаракат қилган Алиреза турнирнинг биринчи рақамли иштирокчиси саналган Каруанани мағлуб этди.  

Grand Chess Tour мусобақасининг бешинчи босқичи ҳисобланган ушбу турнирнинг бугун ўтказиладиган 2-турида ҳамюртимиз Абдусатторов оқ доналарда 1 очко билан пешқадамлик қилаётган Алиреза Фирузжа билан куч синашади.  

Ушбу учрашув ҳар иккиси учунгина эмас, турнирда иштирок этаётган бошқа шахматчиларнинг етакчиликка эришишидаги муҳим босқич саналадики, Нодирбекнинг ушбу турда муваффақият қозониши ғолиблик йўлининг бошланиши бўлиши мумкин.  

Мукофот жамғармаси 350 минг АҚШ долларини ташкил этган турнирда ғолибликка эришган шахматчи 100 минг АҚШ доллари билан тақдирланса, сўнгги ўриндан жой олган гроссмейстер 10 минг 500 АҚШ долларига эга чиқади.  

Т.Рўзиев,

ЎзА