Халқаро шахмат федерацияси 2026 йилги даъвогарлар турнири иштирокчиларининг тўлиқ рўйхатини эълон қилди.

Маълумки, ўтган йилнинг ноябрь ойида Ҳиндистонда ўтган жаҳон кубогида ғолибликни тантана қилган маҳоратли шахматчимиз Жавоҳир Синдоров ва финалда ҳамюртимиздан мағлуб бўлган хитойлик Вэй И ҳамда 3-ўрин учун курашда терма жамоамиз аъзоси Нодирбек Ёқуббоевдан устунликка эришган Андрей Есипенко(ФИДЕ) даъвогарлар турнири йўлланмасига эга чиққан эди.

Куни кеча ФИДЕнинг 2026 йил январь ойи рейтинги тасдиқланиши, шу билан бирга ўтган йил давомидаги натижаларига кўра, америкалик Хикару Накамура даъвогарлар турнирининг сўнгги иштирокчиси номига мушарраф бўлди.

Эслатиб ўтамиз, 8 нафар эркак ва 8 нафар аёл шахматчилар қатнашадиган даъвогарлар мусобақаси жорий йилнинг 28 март - 16 апрель кунлари Кипрда бўлиб ўтади.

Тўлқин Рўзиев, ЎзА