Бугун, 11 октябрь куни Лондонда давом этаётган “Global Chess League “Tech Mahindra” турнирининг сўнгги кунги беллашувлари бўлиб ўтади. Муддатидан аввал турнирда ғолибликни таъминлаган Нодирбек Абдусатторов дона сураётган “PBG Alaskan Knights” жамоаси бугун Хикару Накамура сардорлигидаги “American Gambits” вакиллари билан рўбарў келади.

Шунингдек, бугун “Ganges Grandmasters” – “upGrad Mumba Masters”, “Alpine SG Pipers” – “Triveni Continental Kings” жамоалари куч синашади.

Кеча ўтказилган баҳсда Абдусатторов жамоаси “PBG Alaskan Knights” Синдоров дона сураётган “Triveni Continental Kings”ни мағлубиятга учратди. Ушбу баҳсда “PBG Alaskan Knights” вакилларидан Аниш Гири Алириза Фирузжани, Нодирбек Абдусатторов Вей Ини мағлуб этиши деярли ғалабани таъминлади. Ҳамюртимиз Жавоҳир Синдоров ва жамоадоши Тимур Ражабовнинг ғалабаси ҳам “Triveni Continental Kings”ни очко йўқотишдан асраб қола олмади. Ушбу натижа муддатидан аввал “PBG Alaskan Knights”га турнир ғолиблигини тақдим этди. 

Мукофот жамғармаси 1 миллион АҚШ долларидан иборат турнирда қайси жамоа 2-ўринни эгаллаши 18 очкога эга “Alpine SG Pipers” ва 15 очколи “Triveni Continental Kings” ўртасидаги бугунги тўқнашувда ҳал бўлади.

Эслатиб ўтамиз, турнирда 1-ўринни қўлга киритган жамоа 500 минг АҚШ доллари билан тақдирланса, 2-ўрин соҳиби 250 минг, 3 ва 4-ўринлардан жой олган жамоа 100 минг АҚШ долларига эга чиқади. Шунингдек, кейинги 5-6-поғоналардан жой олган жамоалар ўртасида мукофот жамғармасининг 50 минг АҚШ доллари тақсимланади.

Т.Рўзиев, ЎзА