“Global Chess League “Tech Mahindra”нинг Лондонда давом этаётган иккинчи тур мусобақаларида Нодирбек Абдусатторов дона сураётган “PBG Alaskan Knights” жамоаси кечаги иккита ўйинда ҳам ғалабага эришди.

Кечаги баҳсларда “American Gambits” ва "upGrad Mumba Masters”ни мағлубиятга учратган Нодирбек Абдусатторов жамоаси 9 очко билан 6 та жамоа орасида етакчига айланиб олди.

Мазкур турнир ўйинларида Абдусатторов аввалига “American Gambits” жамоаси аъзоси Ян-Кшиштоф Дуда билан дуранг ўйнади. Кейинги баҳсларда “Triveni Continental Kings” аъзоси хитойлик И Вэйни доғда қолдирган бўлса, “upGrad Mumba Masters” вакили ҳиндистонлик Видит Сантош Гуджарати билан муроса йўлини танлади.

Маҳоратли шахматчимиз Жавоҳир Синдоров эса “Triveni Continental Kings” сафида иккита баҳсда дона сурди. Синдоров илк ўйинда “PBG Alaskan Knights” аъзоси Нихал Саринга имкониятни бой берди. Кейинги ўйинда “Alpine Sg Pipers” аъзоси Дэниел Дардхани билан кечган баҳсда ғалабани тантана қилди. Жавоҳир Синдоров жамоаси 3 очко билан 3-ўринда бормоқда.  

Шунингдек, “upGrad Mumba Masters”, иккинчи ўриндан жой олган. 4- 5-поғоналарда жойлашган “Alpine Sg Pipers” ва “American Gambits” вакилларида ҳам 3 очко мавжуд. Сўнгги поғонада бораётган Вишванатан Ананд сардорлигидаги “Ganges Grandmasters” жамоаси ҳозирча бирон бир очко қўлга кирита олганича йўқ.

Бугун, 5 октябрь куни ўтказиладиган лига баҳсларида “Ganges Grandmasters”-“PBG Alaskan Knights”, “American Gambits”–“Triveni Continental Kings”, “upGrad Mumba Masters”–“Alpine SG Pipers”, “Triveni Continental Kings”-“Ganges Grandmasters” жамоалари иштирокида қизиқарли мусобақалар бўлиб ўтади.

Эслатиб ўтамиз, мукофот жамғармаси 1 миллион АҚШ долларидан иборат “Global Chess League “Tech Mahindra” турнири 12 октябрга қадар давом этади.

Тўлқин Рўзиев, ЎзА