Вашингтонда бўлиб ўтаётган C5+1 саммити ҳақида фикр билдирган Каспий сиёсати бўйича етакчи ходим доктор Эрик Руденшольд саммитни “Президент Дональд Трамп маъмурияти учун жуда муҳим ва долзарб мулоқот” сифатида баҳолади:

– Менимча, мазкур анжуман Президент Трампни Марказий Осиё етакчилари билан жуда муҳим вақтда бирлаштирди. Бу Вашингтон Марказий Осиёни стратегик аҳамиятга эга минтақа сифатида кўраётганини англатади. C5+1 формати нафақат сиёсий мулоқот, балки иқтисодий ҳамкорлик учун ҳам янги имкониятлар яратади. Президент Трамп – тадбиркор сифатида иқтисодий ҳамкорликка жиддий эътибор қаратмоқда. Шу боис саммит ҳар икки минтақа учун ҳақиқий ҳамкорлик майдонига айланиши мумкин. Айниқса стратегик минераллар, сунъий интеллект ва келажак технологиялари соҳаларидаги шериклик истиқболли йўналишлардир.

Шу билан бирга доктор Руденшольд Президент Шавкат Мирзиёев Марказий Осиёнинг янги қиёфасини намоён этаётган етакчи сифатида тан олинганини ҳам алоҳида таъкидлади:

– Президент Мирзиёев янгича фикрлайдиган, очиқ ва ислоҳотпарвар сиёсатчи сифатида эътироф этилмоқда. У минтақадаги давлатлар ҳақидаги дунёқарашни янгилашда фаол етакчилик қилмоқда. Саммит олдидан виза режими либераллаштирилиши, очиқлик сиёсати янада кучайтирилиши Ўзбекистон раҳбарининг доим янгиликка, очиқ мулоқотга интилишининг яққол мисолидир. Бу ташаббуслар биз кутмаган даражада инновацион тарзда намоён бўлди. Президент Мирзиёев минтақани янгича фикрлашга ундамоқда ва бу ўз самараларини бераётир.

Таҳлилчилар фикрича, C5+1 саммити Марказий Осиё ва АҚШ муносабатларида янги саҳифа очди, Ўзбекистон эса айни жараёнда илҳомлантирувчи етакчи сифатида намоён бўлмоқда.

Дилшод Ҳакимов, ЎзА