Бугун, 12 май куни ҳудудлар ва тармоқларда иқтисодий ўсишни таъминлаш бўйича биринчи ярим йилликдаги устувор вазифалар юзасидан бўлиб ўтаётган видеоселектор йиғилишида қурилиш соҳасидаги камчиликлар танқид қилинди.

Таъкидланганидек, биринчи чоракда марказлашган инвестициялар бўйича режага нисбатан 2,7 триллион сўмлик ишлар кам бажарилган. Шу билан бирга, 175 та уй-жойлар массивларининг бор-йўғи 36 таси бўйича пудратчилар аниқланган. Бунда, Қорақалпоғистон, Бухоро, Жиззах, Самарқанд, Сирдарё, Хоразмда объектлар қурилиш рейтинги бўйича мос келмайдиган қурувчи ташкилотларга берилган.

– Агар вилоятларда рейтингга кирмаган битта қурувчи ташкилотга объект берилган бўлса вилоят ҳокими шерик бўлади. Бу давлатнинг пули, ҳар бир сўми учун жавоб берасизлар! Чора жуда қаттиқ, жазо муқаррар бўлади. Рейтингда йўқ дегани – бу таниш-билишчилик, коррупция дегани. Нимага бунга йўл қўйгансизлар? Нимага рейтинги йўқларга имконият яратиб бераяпсизлар? Ким сизларнинг кабинетингизга кириб нималарни таклиф қилаяпти? Қайси қариндошларингга иш бераяпсизлар? Пахтани қўшиб ёзишни йўқ қилдик, лекин саноатда, қурилишда қўшиб ёзишни ўрганаяпсизлар, бунинг охири вой бўлади, – деди Шавкат Мирзиёев.

Бош вазирнинг биринчи ўринбосари О.Раматовнинг таъкидлашича, биринчи чоракда янги тизим бўйича 175 тадан 161 та уй-жой массиви бўйича тендерлар ўтказилган, қолган 14 таси бир ҳафта ичида якунланади. Унинг айтишича, тендерда иштирок этган ташкилотлардан 10 таси рейтингга кирмаган, шу боис улар бекор қилинган.  

Қурилиш вазири Б.Зокировнинг аниқлик киритишича, кўп қаватли уйларни қуришга рейтинги бўлмаса-да, қурби етадиган тадбиркорлар пудратчи сифатида жалб қилинган.  

Президент Шавкат Мирзиёев рейтингги бўлмаса қурувчига бир сўм ҳам пул берилмаслиги, у замон ўтиб бўлганини таъкидлади:  

– Уй бино қиладиган ташкилот қурувчи бўлиши керак. Тадбиркор – тадбиркорлигини қилсин, қурувчи – қурувчилиги билан шуғуллансин. Бўлди, адашган вақтимиз ўтди. Мана, Жиззах вилояти мисолида кўрдик, уй-жой қурилишида қандай жиддий камчиликларга йўл қўйилганини. Шундай экан, рейтинги бўлмаса қурувчи ташкилот тендерга жалб қилинмаслиги керак. Сифат нуқтаи назаридан биринчи марта шу тартибни жорий қилаяпмиз, – деди давлатимиз раҳбари.

Йиғилишда О.Раматов, Б.Зокировга вилоят ҳокимлари билан бирга, икки ҳафта муддатда 139 та турар-жой массиви бўйича тендерларни якунлаб, қурилиш ишларини бошлаш бўйича топшириқ берилди.

М.Элмуродов, ЎзА