Бүгін, 18 мамырда Өзбекстан Президенті Шавкат Мирзияевтің төрағалығымен өткен бейнеконференцияда Денсаулық сақтау министрлігі, оның облыстық, аудандық және қалалық бөлімшелері мен жергілікті атқарушы органдардың медицина саласындағы реформаларды іске асыру деңгейі егжей-тегжейлі талқыланды.

Жиында Мемлекет басшысы медициналық жүйеде бес бағыт бойынша күрделі өзгерістер енгізу керектігін айтты.

Бірінші – алғашқы медициналық көмек бөлімін ауруды ерте анықтайтын және емдейтін жүйеге айналдыру.

Екінші - мамандандырылған орталықтармен жергілікті жерлерде көрсетілетін медициналық қызметтердің көлемін көбейту және сапасын түбегейлі жақсарту.

Үшінші - цифрландыру арқылы қағазбастылықты, бюрократияны және саладағы сыбайлас жемқорлықты күрт азайту.

Төртінші - медицинаның барлық салаларында бәсекенің дамуына және жеке сектордың тез енуіне толық қолдау көрсету.

Бесінші - медициналық кадрлардың білімін арттыру, ғылымды дамыту.

Отырыста осы міндеттерді қалай ұйымдастыруға болатындығы туралы денсаулық сақтау министрінің орынбасарлары, облыс, аудан, қала әкімдерінің, медициналық мекемелер басшыларының ақпараты тыңдалды.