Самарқандга Франциянинг “MEDEF International” ишбилармонлик ҳаракати қошидаги “Ўзбекистон-Франция” кенгаши раҳбари, “Orano” компанияси раиси Клод Имовен бошчилигидаги делегация ташриф буюрди.

Меҳмонлар дастлаб шаҳардаги тарихий-маданий ёдгорлик ва диққатга сазовор масканларни томоша қилди. Самарқандда кейинги йилларда амалга оширилган бунёдкорлик ишлари билан танишди.

Сўнгра Ширин шаҳарчаси дирекциясида вилоят ҳокими вазифасини бажарувчи Адиз Бобоев бошчилигидаги масъуллар ҳамда тадбиркорлар франциялик ишбилармонлар билан учрашди. 

[gallery-21542]

– Француз компанияларининг инновацион, технологик ва инвестицион салоҳиятини юксак баҳолаган ҳолда туризм, шаҳарсозлик, транспорт, энергетика, қишлоқ хўжалиги ва озиқ-овқат саноати соҳаларида ҳамкорлик алоқаларини ўрнатиш ва давом эттиришни таклиф қиламан, – деди Самарқанд вилояти раҳбари А.Бобоев. – Жумладан, шаҳарсозлик ва “ақлли шаҳар” лойиҳаси – биз амалга ошираётган энг катта лойиҳалардан бири 660 гектар майдонни ўз ичига олган Ширин шаҳарчаси қурилишидир. Ушбу замонавий шаҳар тураржой мажмуалари, савдо ва бизнес марказлари ҳамда замонавий инфратузилмани ўз ичига олади. Энергия самарадорлиги юқори бўлган бинолар, замонавий коммунал хизматлар ва Ширин шаҳарчасининг интеллектуал инфратузилмасини ривожлантиришда француз мутахассисларининг тажрибаси жуда муҳим. Мазкур лойиҳа юзасидан Франциянинг бой тажрибага эга бўлган “Ellips Prodjekts EsEyEs” компанияси билан ҳамкорликни йўлга қўйсак, мақсадга мувофиқ бўларди.

“MEDEF International” дунёнинг турли мамлакатлари билан бизнес ва инвестицион алоқаларни ривожлантиришга ихтисослашган ташкилот бўлиб, етти мингдан ортиқ француз компанияларини бирлаштиради.

– Президентимиз давлат ташрифи билан Ўзбекистонга келганда илк бор бу тарихий шаҳарда бўлганман, – дейди “MEDEF International” ишбилармонлик ҳаракати қошидаги “Ўзбекистон-Франция” кенгаши раҳбари, “Orano” компанияси раиси Клод Имовен. – Ўшанда қисқа муддатда Самарқанддаги тарихий қадамжоларни томоша қилиш имкони бўлмаганди. Бугун шаҳарнинг диққатга сазовор жойларига саёҳат қилиб ҳайратландик. Билдикки, Самарқандда туризм энг яхши ривожланган йўналишлардан бири экан. Шаҳарда ушбу соҳа билан бирга соғлиқни сақлаш, жамоат транспорти, энергетика, шаҳарсозлик йўналишларини ривожлантириш бўйича ҳамкорликда лойиҳаларни амалга ошириш тарафдоримиз.

Учрашув якунида Самарқанднинг туризм салоҳияти ҳамда Ширин шаҳарчаси лойиҳаси тақдимот қилинди.

Ғ.Ҳасанов, А.Исроилов (сурат), ЎзА мухбирлари