Олий Мажлис Қонунчилик палатасида бўлиб ўтган “Ҳукумат соати”да депутатларнинг саволларига қурилиш ва уй-жой коммунал хўжалиги вазири жавоб берар экан, Экофракция аъзоси Гулчеҳра Тожибоева қурилиш жараёнларида экологик талабларга риоя қилиниши масаласини кўтарди:

–  Қурилиш, бунёдкорлик ишларида тартибсиз қурилишлар, шаҳар бош режасига амал қилмаслик, шамол йўналишларини ҳисобга олмаслик ёки қурилиш майдонларида экологик талабларни тўлиқ бажармаслик ҳолатлари мввжуд. Тошкент шаҳри атмосферасини яхшилаш бўйича вазирлик томонидан қандай ишлар амалга ошириляпти?

Қурилиш ва уй-жой коммунал хўжалиги вазири Ш.Ҳидоятов:

–  Жаҳон банки мутахассислари Ўзбекистонга келиб, ҳаво таркибидаги зарарли заррачалар миқдорини ўлчаб, аниқлаб беришди. Қурилиш жараёнларининг таъсири экологияга 6 фоизни ташкил этишини кўрсатиб беришди. Бу таъсирларни камайтириш бўйича тегишли ҳужжат қабул қилинди.  

Бундан ташқари, лойиҳачилар томонидан режалаштирилаётган лойиҳаларда шамол йўналиши, нормаларимизда белгиланган қоидалар ҳамда аҳолига қулайликлар ҳисобга олинади. Объектларни давлат экспертизасидан ўтказишда бу қоидалар алоҳида назоратга олинади. Агар белгиланган тартибга амал қилинмаса, бундай лойиҳалар амалга оширилмайди, – деди вазир.  

Шунингдек, вазирлик вакили қўшимча қилар экан, қурилиш соҳаси экологияга таъсир қилувчи йўналишлардан бири экани, қурилишларда юзага келадиган чанг шаҳардаги чангларнинг 6 фоизини ташкил этаётгани, бу катта кўрсаткич эканини қайд этди.  

Таъкидландики, бу борада аввал ҳам чоралар кўрилган. Айниқса, кейинги пайтда бу ишлар изчил давом эттирилиб, қурилиш объектларида рейдлар ўтказилмоқда. Объектлардаги транспорт йўлларини бетонлаш, қурилиш чиқиндиларини ташлашда белгиланган меъёрларга амал қилингани, юк машиналар устига қоплама қоплаш, ғилдиракларини ювиш ишлари ташкил этилиши кабилар устидан назорат  ўрнатилди. Жами 2 минг 400 та қурилиш объекти қатъий назоратга олинди.  

Муҳтарама Комилова,

ЎзА