Жанубий Корея хорижлик беморларга косметик жарроҳлик амалиётлари учун бериб келинган 10 фоизлик солиқни қайтариш имтиёзини 31 декабрдан бекор қилишини эълон қилди. Бу ҳақда South China Morning Post хабар берди. Расмийлар ушбу қарор орқали дунёнинг энг машҳур тиббий туризм марказларидан бири бўлган Сеулга хорижий беморлар оқимини қисқартиришни кўзламоқда.

Мазкур солиқ имтиёзи 2016 йилда жорий этилган бўлиб, юз торттириш, терини ёшартириш, кўкракни катталаштириш ва қовоқ операциялари каби эстетик муолажаларни қамраб олган. Бироқ бу қарор Корея пластик жарроҳлар ассоциацияси томонидан кескин танқид қилинмоқда. Уларнинг фикрича, имтиёз бекор қилиниши нархларни оширади ва хорижий беморлар оқимини камайтиради.

Маълумотларга кўра, Жанубий Корея 2024 йилда асосан Хитой, Япония ва АҚШдан келган 1,17 миллион тиббий туристни қабул қилган. Хорижий беморлар соғлиқни сақлаш хизматларига 840 миллион доллар сарфлаган, уларнинг катта қисми дерматологик ва эстетик муолажаларга тўғри келган.  

Мутахассислар солиқ имтиёзининг тугатилиши Жанубий Кореянинг тиббий туризм бозоридаги рақобатбардошлигини пасайтириб, беморларнинг Сингапур ва Таиланд каби бошқа давлатларга йўналишига сабаб бўлиши мумкинлигидан хавотир билдирмоқда.  

<iframe width="650" height="420" src="https://www.youtube.com/embed/rBRIkNHGgjQ" title="Seul xorijiy tibbiy turistlar uchun soliq imtiyozini tugatadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА