Жанубий Корея собиқ етакчиси Юн Сок Ёль устидан чиқариладиган ҳукм келаси ҳафта жонли эфирда намойиш этилади. Расмий Сеул телеканалларнинг сўровини қаноатлантириб, 19 февраль куни соат 15:00 да бўлиб ўтадиган суд мажлисини тўғридан-тўғри эфирга узатишга рухсат берди, деб ёзмоқда “Yonhap” ахборот агентлиги.

Маълумки, ўлка собиқ давлат раҳбари 2024 йил 3 декабрь куни ҳарбий ҳолат эълон қилиш орқали конституцион тузумни ағдаришга уринишда айбланмоқда. Тергов материалларига кўра, у парламентни блоклаш, депутатларнинг овоз беришини тўсиш ва сиёсий етакчиларни ҳибсга олиш бўйича кўрсатма берган. Прокуратура уни “қўзғолон бош ташкилотчиси” деб атаб, ўлим жазоси талаб қилган.

Мазкур жараёнда собиқ мудофаа вазири ва юқори мартабали хавфсизлик амалдорлари ҳам суд қилинмоқда. 19 февралдаги ҳукм нафақат Юн, балки мамлакатдаги бутун сиёсий элита учун бурилиш нуқтасига айланиши мумкин.

Мусулмон Зиё, ЎзА