Ўзбекистон Республикаси Олий Мажлиси Сенати Хотин-қизлар ва гендер тенглик масалалари қўмитаси раиси ўринбосари Маҳмуджон Парпиев Наманган шаҳри ва Давлатобод туманидаги қатор меҳнат жамоаларида фуқаролар билан учрашди.

Сенатор Наманган шаҳар Бандликка кўмаклашиш маркази жамоаси ва халқ депутатлари шаҳар Кенгашининг фаол депутатлари иштирокидаги мулоқотда Олий Мажлис Сенатининг 17-ялпи мажлисида муҳокама қилинган масалаларни шарҳлаб берди. 

Ялпи мажлисда кўрилган 19 та масала, шу жумладан, 7 та қонун бўйича иштирокчиларда туғилган саволларга атрофлича жавоб қайтарди.

Мулоқот давомида юзага келган айрим масалалар, жумладан, янги ташкил этилган туманлар маҳаллий Кенгашлари фаолиятини қонуний йўлга қўйиш, субсидия берилиб кўп қаватли уйлар олган фуқароларнинг қарзни қайтариш билан боғлиқ юзага келаётган муаммолар ўртага ташланди. Мазкур масалалар сенатор томонидан назаратга олиниши қайд этилди.

Давлатобод туманида жойлашган "Vakkoni" бренди асосида бежирим кийим-бошлар яратиб, экспорт салоҳиятини кенгайтираётган “Люкс плюс сервис” масъулияти чекланган жамиятида бўлиб ўтган учрашувда юртимизда катта тайёргарлик билан кутиб олинаётган Ўзбекистон Республикаси давлат мустақиллигининг 30 йиллик байрами, ўтган даврда қўлга киритилган ютуқлар, ўзгаришлар ҳақида сўз юритилди.

Мазкур корхонада ҳозирги кунда 500дан ортиқ киши иш билан таъминланган. Чеварлар ишлаб чиқараётган маҳсулотлар нафақат Марказий Осиё давлатлари, шунингдек, Россия Федерациясига ҳам экспорт қилинмоқда. Шу кунларда жамият Германия томони билан келишувлар олиб бораяпти.

Оқилхон Дадабоев, ЎзА