Олий Мажлис Сенатининг Хотин-қизлар ва гендер тенглик масалалари қўмитаси раиси Малика Қодирхонова Қуйи Чирчиқда рўй берган нохуш ҳолат юзасидан муносабат билдириб, қуйидаги фикрларни баён қилди:

– Газак олиб кетган муаммо бир четда қолиб, эр ва хотинни яраштиришга уринишга кўпроқ урғу бериш, бу билан мақтаниш авж олгани сир эмас.

Айнан шунинг учун ҳам мажбуран бирга яшаётган оилаларда эрнинг аёлга зўравонлик қилиши, ҳатто унга оғир тан жароҳати етказиши, ўлдириб қўйиши каби ҳолатлар учраб турибди.

Яқинда Тошкент вилояти Қуйи Чирчиқ туманида эр рашк сабаб турмуш ўртоғининг қотилига айланди.

Суриштириб кўрилса, аёл оиладаги келишмовчилик сабаб ўз ота-онасининг уйига кетиб қолган. Эр ва хотин дунёқарашининг бир-бирига мутлақо тўғри келмаслиги, аёлнинг ўзи истамаган ишларга мажбурланиши, калтакланиши уни оилани тарк этишга мажбур қилган. Бундай вазиятда эр шу аёл билан яшашни хоҳласа, уни тушунишга ҳаракат қилиши, кўнгилига қараши керак.

Бироқ, айрим эркаклардаги ўз хоҳишини амалга ошириш, «менинг айтганим бўлади, бўлмаса, ўлдираман», деб аёлга тазйиқ ўтказиши, минг афсуски, кейинги пайтда авж олди.

Мазкур қотиллик ҳам шуни кўрсатиб турибди.

Сенатнинг Хотин-қизлар ва гендер тенглик масалалари қўмитаси тегишли ташкилотлар билан бирга низоли оилаларни аниқлаш, муаммоларни ўрганиш ва ҳал этишга ҳаракат қилиб келмоқда.

Бироқ, юқорида айтилганидек, оилавий ажримларга йўл қўймасликка интилиш барибир кучли. Ўйлашимизча, эр ва хотиннинг мажбуран яшашига чек қўйиш керак.

Тўғри, тушунмовчилик юз берганда, катталарнинг аралашуви, насиҳати билан тинч яшаб кетадиган эр-хотинлар ҳам бор. Аммо, муаммо чуқурлашган, ўзаро ришталар узилиб кетган ҳолатларда масъуллар буни ҳисобга олиши керак.

Ёшларни оилага тайёрлаш, хусусан, уларнинг саломатлиги, руҳий ҳолати, иш билан таъминланганлиги каби жиҳатларга эътиборни кучайтириш эса жуда муҳим.



ЎзА