Ундирилиши лозим бўлган қарздорлик юз минг сўм бўлсаю, ушбу жарима миқдори ўз вақтида тўланмаса, Мажбурий ижро бюроси томонидан ушбу суммага нисбатан бир неча марта юқори жарима белгиланиши мумкин.

Бу ҳол табиийки, фуқароларнинг тўлов қобилиятига салбий таъсир кўрсатиб, уларнинг норозилигини келтириб чиқаради.

Шу билан бирга, белгиланган жарималарни ўз вақтида тўламаганлик учун бугунги кунда барча ижрочиларга маъмурий жаримага тортиш ваколати берилган. Бу ҳолатлар ҳам турли суиистеъмолчилик ва аҳоли норозилигига сабаб бўлмоқда.

“Ижро ҳужжатларини ижро этмаганлик учун солинадиган маъмурий жарима миқдорини белгилаш тартиби такомиллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартиришлар ва қўшимча киритиш ҳақида"ги қонун билан Маъмурий жавобгарлик тўғрисидаги кодексига жариманинг миқдори ижро ҳужжатида ундирилиши белгиланган суммадан юқори бўлиши мумкин эмаслиги ҳақида норма киритилмоқда.

Сенатнинг Суд-ҳуқуқ масалалари ва коррупцияга қарши курашиш қўмитасининг мажлисида шу ҳақда гап борди.  

Асосийси, кодекснинг тегишли моддаларида назарда тутилган маъмурий ҳуқуқбузарликлар тўғрисидаги ишларни кўриб чиқишга ҳамда маъмурий жазо қўллашга ваколатли бўлган шахслар доираси қисқартирилмоқда. Бунга фақат Ўзбекистон Республикасининг Бош давлат ижрочиси, Қорақалпоғистон Республикаси, вилоятлар ва Тошкент шаҳрининг бош давлат ижрочилари, уларнинг ўринбосарлари, шунингдек, Мажбурий ижро бюросининг туман (шаҳар) бўлимлари бошлиқлари ҳақли эканлиги тўғрисидаги ўзгартириш киритилмоқда.

Сенаторлар мазкур қонун мамлакатимизда фуқароларнинг ҳуқуқ ва эркинликлари ишончли ҳимоя қилинишини таъминлаш билан бирга жарималарни тўлашда уларга енгилликлар берилишига хизмат қилишини таъкидлади.  

Мажлисда “Норматив-ҳуқуқий ҳужжатларнинг ва улар лойиҳаларининг коррупцияга қарши экспертизаси тўғрисида"ги қонун ҳам кўриб чиқилди.

Таъкидланганидек, бугунги кунга қадар норматив-ҳуқуқий ҳужжатларни ва улар лойиҳаларини коррупцияга қарши экспертизадан ўтказиш қонун билан эмас, балки Адлия вазирлигининг буйруғи билан тасдиқланган низом асосида тартибга солинган.  

Бу эса етарли самара бермаётгани билан бирга қонунчилик ҳужжатларида коррупциявий бўшлиқларга замин яратмоқда.

Мазкур қонун юқорида қайд этилган муаммоларни бартараф этиш билан бирга ушбу соҳани тартибга солувчи ягона қонун сифатида ишлаб чиқилган.

Коррупцияга қарши экспертизани ўтказиш нафақат адлия органлари, балки Коррупцияга қарши курашиш агентлиги, давлат органлари ва ташкилотларининг юридик хизматлари ҳамда норматив-ҳуқуқий ҳужжатлар ижросини таъминлаш зиммасига юклатилган давлат органлари ва ташкилотлари томонидан ҳам ўтказилиши назарда тутилмоқда.

Бундан ташқари, ваколатли органларнинг ушбу соҳадаги асосий фаолият йўналишлари ҳамда коррупцияга қарши экспертиза ўтказиладиган норматив-ҳуқуқий ҳужжатлар доираси аниқ белгиланмоқда.

Қонун билан белгиланаётган аҳамиятли қоидаларидан бири бу қонунчилик ҳужжатларини коррупцияга қарши экспертизадан ўтказишда жамоатчилик иштирокининг мустаҳкамланаётганидир.

Сенаторларнинг фикрича, ушбу қонун мамлакатимизда коррупцияга қарши курашишнинг ҳуқуқий асосларини янада такомиллаштиришга, коррупциявий ҳолатларнинг олдини олиш, шунингдек, амалдаги ҳамда қабул қилинаётган норматив-ҳуқуқий ҳужжатларнинг сифати ошишига хизмат қилади.

Муҳокама қилинган масалалар юзасидан қўмитанинг тегишли қарори қабул қилиниб, масъул ташкилот ва идораларга тегишли вазифа ва тавсиялар берилди.

Н.Абдураимова, ЎзА