Өзбекстан Олий Мажлис Сенатының Төрайымы Танзила Нарбаева Женева қаласында өткен Парламентаралық одаққа (ПО) мүше елдер парламенттерінің әйел спикерлерінің 15-саммиті аясында бірқатар беделді халықаралық ұйым басшыларымен кездесу өткізді.

ПО президенті Тулия Эксонмен өткен кездесуде Өзбекстан ұсынған цифрландыру, гендерлік теңдікті қамтамасыз ету, жастар саясаты және экологиялық тұрақтылық бағыттарындағы бастамалар жоғары бағаланды. Әңгіме барысында жастар мен әйелдер мәселелеріне айрықша назар аударылып, жастарды парламент қызметіне кеңінен тарту бойынша жаңа бағдарламаларды іске асырудың маңыздылығы атап өтілді.

Танзила Нарбаева Өзбекстан Президентінің бастамасымен Жастар парламенттерінің жаһандық платформасын құру идеясы көтерілгенін еске салып, 2026 жылы Жастар парламенті мүшелерінің 12-жаһандық конференциясына Өзбекстанның иелік етуге дайын екенін жеткізді.

Сенат Төрайымы сондай-ақ ПО Бас хатшысы Мартин Чунгонгпен де кездесті. Тараптар Өзбекстан мен Парламентаралық одақ арасындағы ынтымақтастықты одан әрі тереңдету мәселелерін талқылап, келесі жылы өтеді деп күтіліп отырған Жастар парламенті мүшелерінің 12-жаһандық конференциясын ұйымдастыру мәселелері бойынша пікір алмасты.

Сонымен қатар, Тұрақты даму мақсаттарына арналған 3-жаһандық парламентаралық форумды Өзбекстанда өткізу бастамасы да сөз болды.