Куни кеча Тошкент шаҳрида Олий Мажлис Сенатининг ўттиз олтинчи ялпи мажлиси бошланган эди. Бугун – 28 декабрь куни ялпи мажлис ўз ишини давом эттирмоқда.

Видеоконференцалоқа тарзида ўтказилаётган мажлисни Сенат раиси Танзила Норбоева олиб бормоқда ва жараён Сенатнинг YouTube тармоғидаги саҳифаси орқали тўғридан-тўғри ёритиб борилмоқда.  

Эслатиб ўтамиз, кеча Президентимизнинг Мрожаатномасидан келиб чиқадиган устувор йўналишлар, “2023 йил учун Ўзбекистон Республикасининг Давлат бюджети тўғрисида”ги қонуни кўриб чиқилди.  

“2022 йил учун Ўзбекистон Республикасининг Давлат бюджети тўғрисида”ги, “Мувофиқликни баҳолаш органларини аккредитациядан ўтказиш тўғрисида”ги, “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги, “Техник жиҳатдан тартибга солиш тўғрисида”ги, “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунлар маъқулланди.  

“Ҳуқуқбузарликлар профилактикаси тўғрисида”ги қонунда камчиликлар мавжудлиги ҳисобга олиниб, сенаторлар томонидан рад қилинди.  

Ўзбекистон Республикаси Ҳукумати билан Туркия Республикаси Ҳукумати ўртасида маҳкумларни топшириш тўғрисидаги битим (Тошкент, 2022 йил 29 март) ратификация қилинди.  

Ялпи мажлис иккинчи иш кунида “Солиқ ва бюджет сиёсатининг 2023 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги, Ўзбекистон Республикаси Президентининг 2022 йил 21 декабрдаги “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармонини тасдиқлаш ҳақида, маҳаллалар инфратузилмасини янада яхшилаш бўйича белгиланган лойиҳалар юзасидан амалга оширилган ишлар, 2030 йилга қадар Ўзбекистон Республикасида гендер тенгликка эришиш стратегиясининг 2022 йилдаги ижроси ҳамда уни амалга ошириш бўйича 2023 йилга мўлжалланган чора-тадбирларни тасдиқлаш ҳақидаги масалалар кўриб чиқилади.  

Н.Абдураимова,  

ЎзА