Олий Мажлис Сенатының Төрайымы Танзила Норбаева Еуропалық Одақтың Орталық Азия бойынша Арнайы өкілі Терхи Хакала және ЕО-ның терроризмге қарсы үйлестірушісі Илкка Салмимен кездесті.

Сенат ақпаратына сәйкес, кездесу барысында Өзбекстанның ЕО-мен қарым-қатынасының түрлі бағыттары, атап айтқанда, парламентаралық байланыстарды дамыту, адам құқықтарын қорғау және бостандықтары, терроризм мен экстремизмге қарсы күрес ынтымақтастығы талқыланды.

Сұхбат барысында Сенат төрайымы Өзбекстан мен ЕО арасындағы диалогтың кейінгі жылдары әртүрлі деңгейде жанданғанын баяндап, Еуропа Кеңесі, ЕО Комиссиясы және Еуропарламент өкілдерінің Өзбекстанға практикалық сапарлары мен Өзбекстан үкіметі және парламентінің өкілдері Еуропалық Одаққа сапар ұйымдастырып жатқанын атап өткен.

– Біз Өзбекстан мен Еуропарламент арасындағы парламентаралық байланыстарды дамытуда байқалған оң динамиканың жалғасуын қолдаймыз. Осы орайда «Өзбекстан-Еуропа Одағы» Парламенттік ынтымақтастық комитеті аясында ұйымдастырылған диалог маңызды орын алады, деген Танзила Норбаева.

Өз кезегінде Терхи Хакала жылы қабылдау үшін ризашылығын білдіріп, Өзбекстан «ЕО-Орталық Азия» форматына белсенді түрде қатысып, сауда-экономикалық және инвестициялық қарым-қатынастарды кеңейтіп, ЕО-ның жетекші компанияларын Өзбекстанға тартып жатқанын айтты.

– ЕО Өзбекстанда жүргізіліп жатқан түбегейлі демократиялық реформаларды толығымен қолдайды және Өзбекстанның барлық салаларда халықаралық мойындалған қағидаттарды ұстануын құптайды. «Біз ЕО мен Өзбекстан арасындағы диалогты практикалық мазмұнмен байытуды қолдаймыз», - деген Терхи Хакала.

Ведомство дерегінше, кездесу соңында талқыланған мәселелер бойынша ынтымақтастықты одан әрі нығайтуға келісілді.