Ташкентте өтіп жатқан Парламентаралық одақтың 150-ассамблеясы аясында Өзбекстан Олий Мажлисі Сенатының Төрайымы Танзила Нарбаева БҰҰ Бас хатшысының арнайы өкілі, Орталық Азиядағы превентив дипломатия жөніндегі өңірлік орталықтың басшысы Каха Имнадземен кездесті.

Кездесуде тараптар Өзбекстан мен Біріккен Ұлттар Ұйымының, оның ішінде өңірлік құрылымдарының арасындағы ынтымақтастық жайын кеңінен талқылап, алдағы жоспарларға да тоқталды.

Әңгіме барысында тараптар өңірдегі тату көршілік қарым-қатынастарды нығайту, экономикалық даму үдерістерін қолдау, бейбітшілік пен тұрақтылықты қамтамасыз ету бағытындағы бірлескен күш-жігердің маңыздылығын ерекше атап өтті.

Сондай-ақ су ресурстарын басқару, жастар мен әйелдердің әлеуетін арттыру, қақтығыстардың алдын алу және бейбітшілік орнату ісіне қоғамды кеңінен тарту мәселелерінде ортақ ұстаным қалыптасқаны белгілі болды.

Кездесу соңында екі тарап өзара тиімді әріптестікті одан әрі тереңдетуге және нақты жобалар негізінде жалғастыруға дайын екенін білдірді.