Sirdaryo viloyati bojxona boshqarmasi davlatimiz rahbarining 2022 yil 25 apreldagi "Bojxona hududida qayta ishlash bojxona rejimi qo‘llanilishini soddalashtirishga oid qo‘shimcha chora-tadbirlar to‘g‘risida"gi farmoni ijrosi doirasida “Peng-Sheng” O‘zbekiston-Xitoy qo‘shma korxonasida sayyor uchrashuv tashkil etdi.
Sirdaryo viloyati bojxona boshqarmasi boshlig‘i Nodirbek Salimjonov boshchiligidagi bojxona boshqarmasi mas’ul xodimlari bojxona sohasidagi eng so‘nggi yangiliklar, “Bojxona hududida qayta ishlash” rejimining afzalliklari, “Eksport uch qadamda” hamda bojxona ko‘riklarini inson omilisiz avtomatik taqsimlash tizimlari xususida so‘z yuritib, xodimlar tunu kun tadbirkorlarga xizmat ko‘rsatishga tayyorligini ta’kidladi.
Sayyor uchrashuv doirasida xitoylik ta’sischilar tomonidan ishga tushirilishi ko‘zda tutilgan yangi loyihalar taqdimoti ham o‘tkazildi. Unda mazkur majmuada faoliyat olib borayotgan 14 ta ishlab chiqarish korxonasining elektr iste’molidan kelib chiqib, muqobil energiyadan foydalanish hajmini oshirish maqsadida quvvati 2800 kVt bo‘lgan quyosh panellarini bosqichma-bosqich o‘rnatish ma’lum qilindi.
Tadbirkorlar bojxona to‘g‘risidagi qonunchilikka doir o‘zlarini qiziqtirgan savollarga bojxona boshqarmasi mas’ullaridan javob olishdi.
G‘ulom Primov,
O‘zA muxbiri