Бухоро – эртак шаҳар. Бу тарифни бугун нафақат хорижликлар, балки маҳаллий сайёҳлар ҳам эътироф этмоқда. Давлатимиз раҳбарининг Бухорога ташрифи чоғида берган топшириқлари асосида бугун вилоятда туризм соҳаси улкан ривожланиш босқичига кирди. Буни аниқ мисолларда таҳлил қиладиган бўлсак, ҳозирда 15 мингдан ортиқ жойлаштириш ўринларига эга вилоятда Қурбон ҳайити сабаб меҳмонхоналарни банд қилиш кўрсаткичи 100 фоизга етди. Шундан 80 фоиздан ортиғи маҳаллий сайёҳлар ҳиссасига тўғри келди.

– Фарғона вилоятидан келдик, – дейди маҳаллий сайёҳ Умриддин Собиров. – Ҳайит байрами муносабати билан берилган уч кунлик дам олишдан фойдаланиб кўҳна ва боқий Бухорога келдик. Жуда ҳам чиройли шаҳар экан, айниқса, бухороликларнинг меҳмондўстлиги менга жуда ёқди. 

Турли меҳнат жамоалари, нуронийлар, ёшлар вакиллари дам олиш кунларида айнан мамлакатимизнинг тарихий шаҳарларини танлашди. Транспорт, меҳмонхона хизматлари, музей ва тарихий масканларга кириш имтиёзлари тақдим этилгани кўпчиликни бирдек хурсанд қилди.

– Нукус шаҳридан келдик, – дейди маҳаллий сайёҳ Мират Султанов. – Тарихий шаҳар жуда чиройли экан. Кўпчилигимиз биринчи маротаба келяпмиз. Эртакнамо жой экан.

[gallery-17910]

2023 йил якуни билан вилоятда 142 та туристик ташкилотлар мавжуд бўлса, бугун уларнинг сони 170 тага етди. Албатта меҳмонларга сифатли хизмат, ҳамроҳ таржимонларнинг бириктирилиши ҳам керакли инфратузилма шаклланаётганининг амалдаги ифодасидир.

– Бухорога ҳам маҳаллий, ҳам чет эллик сайёҳларнинг келиши ортиб боряпти, – дейди ҳамроҳ таржимон Наврўз Фатуллаев. – Айниқса, байрам муносабати билан берилган имтиёз ва имкониятлардан фойдаланиб келаётган сайёҳлар жуда мамнун. 

Мутасаддиларнинг таъкидлашича, 2023 йил вилоятга 1 миллион 387 минг хорижий сайёҳ ташриф буюрган. Жорий йилда 1,5 миллиондан ортиқ туристларни жалб қилиш режалаштирилган. 

– Биз Италиядан Тошкентга самолётда келдик, – дейди италиялик сайёҳ Андреа Макетти. – Шундан сўнг Хивани томоша қилдик. Бу қадим шаҳар ҳам бизга жуда ёқди. Таассуротларимиз бир олам. Айниқса, миллий таомлари жуда маъқул бўлди. Бухорога етиб келганимизга кўп бўлмади. Шунга қарамай сезиб турибман бизни олдинда янада ҳайратланарли масканлар кутиб турибди. Биринчи манзилимиздаёқ бунга амин бўляпмиз. Ҳозирча хулосамиз Ўзбекистонга кўпроқ муддатга келиш керак экан.

Ёз ойларида ҳам аксарият Европа давлатлари вакиллари саёҳат учун Ўзбекистонни танламоқда. Бу юртимизда туризмга қаратилаётган эътиборнинг яна бир исботи. Демак, хорижликларнинг талабига яраша таклифни шакллантириш учун янги имкониятлар ишга солинади. Тадбиркорлар манфаатдорлиги ошади, янги иш ўринлари яратилишига асос бўлади.

Зариф Комилов, Тоҳиржон Истатов (сурат), ЎзА мухбирлари.