Prezidentimiz Shavkat Mirziyoyevning 2022 yil 30 apreldagi “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida” Qaroriga muvofiq, Madaniyat va turizm vazirligi Soliq qo‘mitasi  bilan hamkorligida  «Keshbek» tizimi joriy etilmoqda.

Vazirlikdan olingan ma’lumotlarga ko‘ra, 2022 yilning 1 sentyabrdan boshlab “O‘zbekiston bo‘ylab sayohat qil!” dasturi bo‘yicha mamlakatimiz bo‘ylab sayohat qilgan O‘zbekiston Respublikasi fuqarolari xarajatlarining bir qismi qoplab berilmoqda. 

“Sayohatlar uchun keshbek” platformasida ishlash  juda oson. Buning uchun foydalanuvchi Soliq.uz mobil ilovasini yuklab olishi va FaceID orqali shaxsini tasdiqlashi lozim. Shundan so‘ng ilovada sayohat yo‘nalishi va boshlanish sanasini belgilashi, avia, temir yo‘l yoki avtobus chiptalarining fiskal cheklarini skanerlab kiritishi kerak bo‘ladi. Sayohatdan so‘ng “sayohatni tugatish” tugmachasini bosib, yig‘ilgan keshbek  mablag‘ini mahalliy bankning shaxsiy plastik kartasiga ko‘chirishi lozim.

 «Keshbek» tizimi soliq xizmatining  maxsus mobil ilovasiga ulangan. Mobil  ilova yordamida xarajatlarning ishonchliligi tekshiriladi,  sayohatlar chekning shtrix-kodi (QR-kod)  hamda sayyohlarning doimiy yashash joyi ko‘rsatilgan holda ro‘yhatga olinadi. Sayyoh  samolyot, poyezd yoki avtobusdan foydalansa,  madaniy ob’ektlar va mehmonxonalarda bo‘lsa,  xarajatlarni qoplash butun sayohat davomida amalga oshiriladi. 

Sayohat xarajatlari  mamlakatimiz sayyohlarining bank kartalarigagina  va faqat  ushbu platformada ro‘yhatdan o‘tgan ichki  sayohatlar uchun qaytariladi. 

 Roman  BONDARCHUK tayyorladi, O‘zA