Андижонда Ўзбекистон “Миллий тикланиш” демократик партияси вилоят кенгаши томонидан “Сайлов жараёнларида партия фаолиятини ёритишнинг янгича усуллари” мавзусида босма ва электрон оммавий ахборот воситалари вакиллари иштирокида ўтказилган матбуот анжуманида юқоридаги каби қатор саволлар доирасида муносабатлар билдирилди. Шунингдек, тадбирда журналистларга партиянинг ОАВ билан ҳамкорлиги, умуман, сайловга тайёргарлик ишлари, партия сайловолди дастури, унинг муҳим йўналиш ва жиҳатлари ҳақида кенг маълумот берилди.

– Жорий йилда “Янги Ўзбекистон. Янги сайловлар” шиори остида ўтказиладиган сайловлар аввалги сайловлардан тубдан фарқ қилади, –дейди Ўзбекистон “Миллий тикланиш” демократик партияси вилоят кенгаши раиси Ҳомиджон Омонов. – Чунки кейинги йилларда мамлакатимиз ижтимоий-сиёсий ҳаётидаги демократик ўзгаришлар нафақат партиялар, балки фуқароларнинг ҳам сайловларга бўлган муносабатини ўзгартириб юборди. Шу маънода партия вилоят кенгаши сайлов жараёнидаги тарғибот-ташвиқот тадбирларини самарали ташкил этиш, депутатликка номзодларнинг сайловолди дастурларини оммавий ахборот воситалари орқали ёритиш бўйича қатор таклифлар ишлаб чиқди. Мақсадимиз, ана шу таклифлар асосида оммавий ахборот воситалари билан ҳамкорликни кучайтириш, тарғибот ишларини самарали йўлга қўйишдан иборат.

Анжуманда бу борадаги ишлар самарадорлигини ошириш, партия сайловолди дастурини тарғиб этиш, сайловларда фуқароларнинг онгли ва фаол иштирокини таъминлаш, партия ва ОАВ ҳамкорлигини кучайтириш юзасидан таклиф, фикр ва мулоҳазалар билдирилди.

Очиқ мулоқот тарзида ўтган анжуманда билдирилган таклифлар партия вилоят кенгашининг медиа режасини ишлаб чиқишда муҳим аҳамият касб этиши қайд этилди.