ОНЛАЙН

Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтмоқда. Мажлис «Ўзбекистон», "UzReport" телеканаллари ҳамда Қонунчилик палатасининг фейсбукдаги саҳифаси орқали жонли эфирга узатилмоқда. 

Мажлис кун тартибидан бир қатор қонун лойиҳалари ўрин олган. Жумладан, депутатлар «Ўзбекистон Республикаси Савдо-саноат палатаси тўғрисида»ги Ўзбекистон Республикаси Қонунига қўшимча ва ўзгартиш киритиш ҳақида»ги қонун лойиҳасини иккинчи ўқишда кўриб чиқдилар.   

Қайд этилганидек, хўжалик шартномалар доирасида юзага келадиган енгиб бўлмайдиган кучлар (форс-мажор) ҳолатларини тасдиқлаш амалдаги қонунчиликда белгиланмагани тадбиркорлик субъектлари учун амалиётда бир қатор муаммоларни вужудга келишига сабаб бўлаётган эди. Хусусан, коронавирус пандемияси сабабли кўплаб тадбиркорлик субъектлари маҳаллий шартномалар доирасида юзага келадиган енгиб бўлмайдиган кучлар (форс-мажор) ҳолатларини тасдиқлашни сўраб Савдо-саноат палатасига мурожаат қилган. Лекин палата бундай ваколатга эга бўлмагани сабабли, форс-мажор ҳолатларини тасдиқловчи сертификатлар берилмаган ва тегишли идоралар ёки хўжалик юритувчи субъектларга фақатгина хат чиқариш билан чекланилган. 

Муҳтарама Комилова, ЎзА