Саудия Арабистони ўзининг Arab Light нефтининг бир баррелини Европага 25 доллардан сотишни ва етказиб беришни уч баробар кўпайтиришни режалаштирмоқда.

Аниқланишича, бир баррел учун 25 доллар Россиянинг Urals русумидаги нефтига қараганда анча арзон бўлиб, Европа нефть бозорини “нефть учун Ар-Риёд ва Москва ўртасидаги қақшатқич жанг майдонига айлантиради“. Агар Urals нархни туширмайдиган бўлса, бозордан сиқиб чиқарилади.

Давлатга тегишли Saudi Aramco нефть компаниясининг нефтни катта чегирма билан сотиш борасидаги таклифини Британия ва Нидерландиянинг Royal Dutch Shell, Британиянинг BP, Франциянинг Total, Испаниянинг Repsol ва CEPSA компаниялари қабул қилди. Европа компаниялари одатдагидан 25-200 фоиз ортиқ даражада нефть етказиб берилишини истамоқда.

Европа Саудия Арабистонидан нефть экспорти кўпаядиган асосий минтақага айланади. Шу кунгача Саудия Арабистони нефть экспортининг 10 фоизи Европа ҳиссасига тўғри келарди.

Яқинда Саудия Арабистони нефть қазиб олиш ҳажмини бир кунда 1 миллион баррелга кўпайтириш билан пўписа қилганди. Бунга Россия нефть қазиб олишни қисқартиришга рози бўлмагани боис ОПЕК+келишуви барбод бўлгани сабаб бўлди. Шундан сўнг нефть нархи тушиб кета бошлади. Ҳозир Brent 33,5 доллар туради, Россиянинг Urals нефтининг бир баррели 32,25 доллардан сотилмоқда.

Нефть нархи тушиб кетгач, евро ва доллар курси нефтга қарам мамлакатларда бирданига кўтарилиб кетди.