Сауд Арабиясының ірі туристік «Zahid Travel Group» компаниясы Өзбекстанмен ынтымақтастық жасайды.

Dunyo ақпарат агенттігінің хабарлауынша,  Өзбекстанға туристер ағынын арттыру шаралары аясында Өзбекстанның Жидда қаласындағы Бас консулдығы «Zahid Travel Group» бас директоры Ахмад Радимен кездесу өткізді.

Сұхбатта Самарқанд, Хиуа, Бұхара және Ташкент сынды қалалар аумағында бірегей көне сәулет ескерткіштері, олардың әсем табиғаты, өзбек халқының ғасырлар бойы қалыптасқан салт-дәстүрлері, әдет-ғұрыптары мен мерекелері жыл сайын көптеген шетелдік туристерді тартатыны айтылды.

Кездесу барысында Ахмад Ради Сауд Арабиясынан Өзбекстанға туристер жіберу үшін Өзбекстанда жұмыс істейтін ірі туристік компаниямен ынтымақтастыққа дайын екенін мәлімдеп, Сауд Арабиясының  мемлекеттік мекемелерден немесе жеке сектордан 50 адамнан тұратын туристер тобын Өзбекстанға жіберуді жоспарлап отырғанын айтқан.

«Zahid Travel Group» 1958 жылы Сауд Арабиясындағы алғашқы туристік агенттіктердің бірі ретінде құрылған. Туристік агенттік әртүрлі мемлекеттік органдар мен жеке сектор өкілдерінің шетелге сапарларын ұйымдастырады. Компанияда 36 ұлттың 5000 адамы жұмыс істейді және бас кеңсесі Жидда қаласында орналасқан.