Өзбекстан Республикасы Премьер-Министрінің орынбасары – Инвестициялар және сыртқы сауда министрі Сардор Умурзаков Біріккен Араб Әмірліктерінің Үкімет істері министрі Мухаммед бин Абдулла әл-Гергавимен кездесті.

Министрлік мәліметінше, келіссөздер барысында тараптар БАӘ үкіметімен 2019 жылдың сәуір айынан бастап іске асырылып жатқан мемлекеттік басқарудың тиімділігін арттыру бағдарламасын жүзеге асырудағы ынтымақтастық нәтижелерін талқылады.

Соңғы үш жылда бағдарлама аясында 25 түрлі бағыт бойынша 142 семинар, 175 идея, оның ішінде «Үкімет акселераторы», «Бір миллион бағдарламашы», «Жас көшбасшылар» жобасы мен  экономикалық және әлеуметтік өмірдің түрлі салаларындағы басқа да маңызды бастамалар болғаны айтылды. 

Тараптар серіктестіктің тиімділігі мен практикалық маңыздылығын қарап, нақты жобалар мен бастамаларды жүзеге асыру барысын жан-жақты талқылады. Соның нәтижесінде экономикалық және әлеуметтік саланың жаңа бағыттарын қамтитын мемлекеттік басқару саласындағы ынтымақтастықты жалғастыруға және кеңейтуге өзара мүдделілік танытты.

Кездесу соңында Өзбекстан мен БАӘ мемлекеттік басқару саласындағы ынтымақтастықты алдағы үш жылға ұзарту туралы келісімге қол қойды.

Жаңартылған бағдарлама тұжырымдамасы БАӘ-нің қолдауымен қаржы, білім, экономика, мемлекеттік басқару, азық-түлік қауіпсіздігі және ауыл шаруашылығы, кеден және логистика салаларында жаңа оқу бағдарламалары мен оқыту іс-шараларын құруды көздейді.