Өзбекстан үкіметі мен іскер делегациясының Иранға сапары барысында Премьер-министрдің орынбасары – Инвестициялар және сыртқы сауда министрі Сардор Умрзаков Тегеранда Иран президенті Ибрагим Раисимен кездесті.

Министрліктің хабарлауынша, кездесу барысында тараптар сауда-экономикалық, инвестициялық, көлік-логистика, сондай-ақ мәдени-гуманитарлық ынтымақтастыққа бағытталған Өзбекстан-Иран қатынастарының кең ауқымы жөнінде пікір алмасылды.

Тараптардың пікірінше, инвестициялық ынтымақтастықтың жолында ауқымды мүмкіндіктер бар. Бұған ирандық инвесторлармен бірлескен жобалардың көбеюі, сондай-ақ ирандық іскер топтардың Өзбекстан нарығы мен экономикалық ресурстарына деген қызығушылығының артуы дәлел. Осыған орай сауда-экономикалық және ғылыми-техникалық ынтымақтастық жөніндегі Өзбекстан-Иран үкіметаралық комиссиясының алдағы 14-ші отырысы барысында бірқатар жаңа инвестициялық жобаларды жүзеге асыру бойынша келісімдерге қол қою жоспарлануда.

Бұдан бөлек, Өзбекстан мен Иран арасындағы агроөнеркәсіп, су ресурстарын басқару, құрылыс материалдарын өндіру, қара металлургия, машина жасау, жеңіл өнеркәсіп және медицина салаларындағы ынтымақтастықтың басым бағыттары белгіленді.

Арнайы экономикалық аймақтар, атап айтқанда, «Чабахор», «Арас» (Иран) пен «Науаи» және «Ангрен» (Өзбекстан) Еркін экономикалық аймақтар арасында өнеркәсіптік кооперацияны құру перспективалары атап өтілді. Жоғарыда аталған бағыттар бойынша нақты инвестициялық жобаларды дайындау және бекіту, сондай-ақ екі елдің мүдделі кәсіпкерлері арасында жоба бастамашыларын анықтау бойынша бірлескен жұмыс туралы келісімге қол жеткізілді.

Тараптар екі елдің тиісті министрліктері мен ведомстволары арасындағы көлік және логистика саласындағы екіжақты келіссөздердегі ілгерілеушілікті құптап, екі ел мен аймақ елдерін байланыстыратын жаңа, арзан сауда бағыттарын қалыптастырудың, сондай-ақ екі елдің көліктік-транзиттік әлеуетін пайдалану тиімділігін арттыру бойынша дәйекті бірлескен жұмысты жалғастырудың маңыздылығын атап өтті.