Дунёда иқтисодиётнинг турли соҳаларида муқобил энергия манбаларидан кенг фойдаланилади. 

Юртимизда ҳам энергоресурсларни тежаш, бунда муқобил энергия манбаларидан тўғри фойдаланиш бўйича кенг кўламдаги ислоҳотлар олиб борилмоқда. Чунки қайта тикланадиган энергиянинг ушбу туридан йил давомида фойдаланиш мумкин ва бу амалда ўз исботини топмоқда.

Мутахассисларнинг таъкидлашича, қуёш иссиқлик энергиясидан фойдаланиш табиий газ ишлатишни 60 фоизгача камайтирар экан. 

“Навоий кон-металлургия комбинати” АЖда ҳам қайта тикланадиган энергетикани ривожлантиришга алоҳида эътибор қаратилиб, корхона бўлинмаларида электр энергиясига бўлган эҳтиёжни қондириш ва бу орқали ишлаб чиқариладиган маҳсулотлар таннархини камайтириш бўйича ислоҳотлар олиб борилмоқда.

Бугунги кунда комбинатга қарашли Шимолий кон бошқармасида қуввати 2550 кВт бўлган 11 та қуёш фотоэлектр станциялари қурилиб, ишга туширилди. Бундай яшил энергетиканинг саноатга кириб келиши натижасида шу йилнинг ўзида 2 миллион 292 минг кВт электр энергияси иқтисод қилинди. Бу эса корхонага қарийб 2,3 миллиард сўмлик фойда келтирди. 

Албатта, ишлаб чиқаришнинг гигант корхоналарида электр энергиясини муқобили билан алмаштириш бироз қийинчилик туғдиради. Бироқ Шимолий кон бошқармаси энергетиклари томонидан пухта ишланган режа асосида 3-гидрометаллургия заводининг Сорбция, регенерация ва тайёр маҳсулот ишлаб чиқариш цехини электр энергияси билан таъминловчи қуёш фотоэлектр станцияси ишга туширилди. Ушбу станцияда 1818 дона фотоэлектрик панеллар ўрнатилган бўлиб, умумий қуввати соатига 1000 кВтни ташкил этади. Ушбу станция йилига тахминан 1,3 миллион кВтгача электр энергияси ишлаб чиқаради. Бу эса электр энергияси харидини камайтириб, маҳсулот ишлаб чиқариш таннархини тушириш имконини берди.

Шунингдек, кон бошқармасининг ишлаб чиқариш корхоналарида 1202 дона қуёш коллекторлари ўрнатилган бўлиб, иссиқ сувга бўлган талаб қондирилмоқда. 

А.Бўриев, ЎзА мухбири