АОКАда Инвестициялар, саноат ва савдо вазирлиги бошқарма бошлиғи ўринбосари Огулнур Атаева иштирокида бўлиб ўтган брифингда республикада ташкил этилган саноат зоналарининг фаолияти юзасидан маълумот берилди.

Қайд этилишича, республикада жами 756 та саноат зонаси, жумладан, 25 та махсус иқтисодий зона, 529 та кичик саноат зона, 202 та ёшлар саноат ва тадбиркорлик зонаси ташкил этилган бўлиб, саноат зоналарининг тасдиқланган бош режаларига асосан жами 12,5 минг гектар ер майдони лойиҳаларни жойлаштириш учун мўлжалланган. Жорий йилнинг ҳозирги ҳолатига кўра, 6,8 минг гектарда қиймати 194,4 триллион сўм бўлган 8  минг 722 та лойиҳа жойлаштирилган. Шундан, қиймати 65,4 триллион сўмлик 4 минг 915 та лойиҳа ишга туширилиб, жами 173,3 минг янги иш ўрни яратилган.  

2024 йилнинг январь-май ойлари давомида жами 22,2 триллион сўмлик маҳсулотлар ишлаб чиқарилган. Шундан 380,3 миллион доллар миқдорида маҳсулотлар экспорт қилинди. Шунингдек, йил якунига қадар 744 та лойиҳани амалга ошириш натижасида 17,3 мингта иш ўрни яратиш ҳамда қўшимча 32,4 триллион сўмлик маҳсулотлар ишлаб чиқариш ва 653,9 миллион долларлик экспорт қилиш режалаштирилган.  

Муҳайё Тошқораева,  

ЎзА