Sanoat energetika guruhi yurtimizdagi vertikal integratsiyalashgan siklli eng yirik neft va gaz kompaniyalaridan biri sanaladi.

Mazkur kompaniya O‘zbekiston Respublikasida neft qazib olishni ko‘paytirish davlat dasturi ijrochisi bo‘lib, 103 ta neft konidan foydalanadi.  

Sanoat energetika guruhi ijrochi direktori To‘lqin Yusupovning qayd etishicha, 2019 yilda kompaniyaga konlar topshirilgan vaqtda umumiy neft qazib olish hajmi yiliga 378 ming tonnani tashkil etar edi. 2022 yilda kompaniya qazib chiqarishni 586 ming tonnaga yetkazishga muvaffaq bo‘ldi.

- Kompaniyaning 750 million dollardan ortiq asosiy investitsiyalari ham neft, ham gaz sohalarini rivojlantirishga qaratilgan.  

103 ta neft konida qidiruv ishlari oldidan olib borilgan izlanishlar doirasida kompaniya mutaxassislari 78 ta konda gaz uyumlari mavjud hududlarni aniqladi. Ayni paytda ulardan 33 tasi o‘zlashtirilmoqda.  

Shu tariqa, 2021 yildan 2022 yilgacha bo‘lgan davrda kompaniya gaz qazib olishni 3,5 barobarga - yiliga 389 million metr kubdan 1,4 milliard metr kubgacha oshirishga erishdi.  

Neft qazib olish va qayta ishlash jarayonida konlarda ajraladigan yo‘ldosh neft gazini utilizatsiya qilish dasturining ishga tushirilishi kompaniya rivojiga katta turtki berdi.  

Mash’ala gazlarini utilizatsiya qilish maqsadsiz yoqib yuboriladigan gazni tejash va “O‘ztransgaz” aksiyadorlik jamiyati gaz uzatish tizimi orqali aholi ehtiyojlari uchun jo‘natish imkonini yaratadi.  

“Shimoliy Sho‘rtan”, “Shirkent” va “To‘rtsari” konlarida 30 yildan buyon yo‘ldosh neft gazi yoqib kelinayotgan edi. Mash’ala gazlarini utilizatsiya qilish dasturi mash’aladan foydalanmasdan gazni seolitni tozalash inshootlarida separatsiya qilish va qayta ishlash yo‘li bilan tayyorlash uchun yo‘naltirishni ko‘zda tutadi, — dedi Saneg ijrochi direktori To‘lqin Yusupov.

Mash’ala gazlaridan foydalanish dasturini amalga oshirishga yo‘naltirilgan investitsiyalarning umumiy hajmi $12,5 million dollarni tashkil etadi.

Bugungi kunda O‘zbekistondagi gaz qazib olish hajmining qariyb 5 foizi ushbu kompaniya hissasiga to‘g‘ri keladi. 2026 yilgacha ishlab chiqarish dasturi doirasida kompaniya gaz qazib olishni 3 milliard metr kubga yetkazadi. Asosan Buxoro-Xiva neft -gaz hududidagi konlarni o‘zlashtirish, zamonaviy geologiya-qidiruv texnologiyalarini jalb qilish hisobiga hajmlarni oshirishga erishish rejalashtirilgan.  

Yangi mahsuldor ufqlarda yer qa’rining neft -gaz salohiyatini aniqlash uchun o‘ta chuqur quduqlarni burg‘ulash, kompaniya investitsiya ob’ektlarida, jumladan, Ustyurt hududida 3D qamrovli seysmik tadqiqotlarni o‘tkazish kabilar hozirgi vaqtda istiqbolli yo‘nalish hisoblanadi. Yangilangan ma’lumotlarni olgach, biz o‘zimizning operatsion faoliyatimizni kengaytirishning, shuningdek, kompaniyanining ishlab chiqarish quvvatlarini yangi darajaga olib chiqishning uddasidan chiqa olamiz, — dedi T.Yusupov.  

Nasiba Ziyodullayeva, O‘zA