Россиянинг Санкт-Петербург шаҳрида икки фуқарода маймун чечаги касаллиги тасдиқланди. Беморлар шаҳар клиникаларидан бирига жойлаштирилган, шифокорлар уларнинг ҳолатини ўртача оғир, дея баҳолаган.

Мутахассислар таъкидлашича, маймун чечаги вируси асосан касалланган инсон ёки ҳайвон билан яқин мулоқот орқали юқади. Инфекция асорати терида оғир яллиғланиш, ўпка шамоллаши (пневмония) ҳамда қонга инфекция тушиши – сепсис каби жиддий ҳолатлар билан намоён бўлади.

Жаҳон соғлиқни сақлаш ташкилоти маълумотига кўра, 2022 йил январдан 2024 йил ноябрь ойи охирига қадар дунё бўйлаб маймун чечаги билан боғлиқ 117 663 ҳолат рўйхатга олинган. Ушбу касаллик билан боғлиқ энг мураккаб эпидемиологик вазият Африка қитъасида кузатилмоқда. Хусусан, Конго Демократик Республикаси, Бурунди ҳамда Уганда давлатларида кенг кўламли касалланиш ҳолатлари аниқланган.

Ф.Яхшибоева, ЎзА