Кармананинг Гал-гал, Майизак, Бичамчи, Сангбур каби тоғолди адирлари ҳам бағрида катта бебаҳо тарихни “қучоқлаб” ётибди. Биз айтмоқчи бўлган “кунжуттош” айнан Сангбур дарасида учрайди.

Сангбур адирлиги Кармана шаҳридан 11-13 километр жанубда жойлашган бўлиб, бу ерда матоларни бўяшда ишлатиладиган, халқ тилида “қизил кесак” деб номланган минерал бўлган. Бундан ташқари, ушбу майдоннинг ер юзаси қизғиш тупроқ билан қопланган бўлиб, 40-60 сантиметр ковласангиз, гранит тошларига дуч келасиз. Бу тош маҳаллий халқ ўртасида “кунжуттош” деб номланиб, ундан тегирмон тоши тайёрланади. Бугунги кунда Сангбурсойнинг ҳар икки томонидан ҳам тегирмон тошлари ковлаб олинган майдонларни кўриш мумкин.

[gallery-5623]

Навбаҳорнинг “Сармишсой” дарасидаги қадимий петроглифларни томоша қилиш қанчалик завқли бўлса, Сангбурсойни ҳам бир бор бориб кўриш кишига ажиб таассурот беради. Сабаби мазкур ҳудуд бир неча асрлар илгари юз берган воқеа-ҳодисалардан сўзлайди.

Сирож АСЛОНОВ (сурат), ЎзА