Молдова Президенти Майя Санду “Pro TV” орқали эфирга чиқиб, “Россия баҳорда мамлакатда яна бир бор вазиятни издан чиқаришга уриниб кўради” мазмунида фикр билдирди. Бинобарин, у мазкур позицияси қандай асосга эгалигини айтмаган.

Санду аввал ҳам йилнинг биринчи ярмида республикада конституцион тартибни ўзгартиришга уриниш бўлганини айтган эди. У парламентни хавфсизлик соҳасида қонунчиликни кучайтиришга чақирган.

– Ўйлашимизча, РФ вазиятни издан чиқаришга уринишни давом эттиради, ушбу ҳаракат баҳорга яқин бошланади ва шу ердаги одамлардан фойдаланилади, – деди Санду. – Эҳтимол, тактика бироз ўзгариши мумкин. Фуқароларимиз овозини ва демократик сайловни ҳимоя қилиш учун биз маҳаллий сайловдан олган сабоқни ўрганишимиз, таҳлил қилиб чиқиб, зарур чоралар кўришимиз керак.

Унинг таъкидлашича, аниқ чоралар ҳақида маҳаллий сайлов жараёни чуқур ўрганилгандан кейин гапириш мумкин. Жумладан, Президент эслатишича, қатор мухолиф партиялар хориждан, хусусан Россиядан молиявий ёрдам олган.

Россия билан Молдова муносабати 2020 йил Европа ҳамжамиятига интилаётган сиёсатчи Майя Санду давлат раҳбарлигига келгач, ёмонлаша бошлаган.