Марказий Африкадаги Сан-Томе ва Принсипи оролида амалга ошмай қолган давлат тўнтаришига уриниш оқибатида камида 5 киши қурбон бўлди, деб хабар тарқатди Франциянинг RFI радиостанцияси.

"Бизнинг маълумотларимизга кўра, камида беш киши, жумладан, мухолифат партияси раҳбари ва собиқ исёнчи Арлесиу Кошта ҳалок бўлди", — дейилади хабарда.

Хабарда таъкидланишича, хавфсизлик кучлари давлат тўнтариши бошлангандан кейин ўнлаб кишиларни ҳибсга олган. Уларнинг орасида ҳарбийлар ҳам, тинч фуқаролар ҳам бор.

Радиостанциянинг маълум қилишича, ҳукумат давлат тўнтаришига уринишда Жанубий-Африка Республикасида ташкил этилган ва Апартеиддан кейин тарқатиб юборилган  “Ҳукузлар” батальонини гумон қилмоқда.

Таъкидланишича, батальоннинг собиқ ёлланма аскари Кошта Сан-Томе ва Принсипида 2003 йилдаги амалга ошмай қолган давлат тўнтаришига уринишда ҳам иштирок этган. У, шунингдек, 2009 йилда ҳукуматни куч билан алмаштиришга уриниш иши  бўйича ҳам судланган.