Яқинда Истанбулдан Сан-Францискога йўл олган халқаро рейсда ғалати воқеа юз берди. “Aviation A2Z” нашри  маълум қилишича, парвоз давомида вафот этган ҳиндистонлик йўловчининг жасади самолёт ерга қўнгандан кейин изсиз ғойиб бўлган.

– Жасаднинг ғойиб бўлиши билан боғлиқ воқеага “Turkish Airlines” компанияси ва АҚШ расмийлари тергов давомида аниқлик киритиши кутилмоқда, -деб ёзади манба.

Хабарга кўра, “Турк Ҳаво йўллари” учоғи Гренландия узра учиб кетаётганда йўловчилардан бирининг аҳволи ёмонлашган. Шифокорларнинг уринишларига қарамай, у вафот этган. Натижада ҳаво кемаси Чикагодаги  “ОХара”  аэропортига фавқулодда қўнишга мажбур бўлган.

Белгиланган тартибларга кўра, жасад Иллинойс штатидаги Кук округи ўликхонасига топширилиши керак эди. Бироқ ушбу тиббий марказ вакиллари жасадни олмаганликларини айтишган.

Шунингдек, аэропорт ходимлари ва авиакомпания вакили йўловчининг ўлими ва унинг шахси ҳақида бирор маълумот беришни истамаган.

С.Раҳимов, ЎзА