Samarqand davlat universitetida an’anaviy “Rektor kubogi” sport musobaqalari boshlandi. Mazkur bellashuvlar futbol, voleybol, kurash kabi ommabop sport turlarini o‘z ichiga olgan.

Tadbirda Samarqand davlat universiteti rektori, O‘zbekiston Respublikasi fan arbobi, Oliy Majlis Senati a’zosi Rustam Xolmurodov, Samarqand viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Husan To‘xtayevlar ishtirok etdi.

Musobaqalar boshlanishidan avval tashkil etilgan badiiy chiqishlar tomoshabinlarga bayramona kayfiyat bag‘ishladi. Badiiy gimnastika, futbol, voleybol, basketbol, qo‘l to‘pi va kurash sport turlari bo‘yicha chiqishlar ishtirokchilar va mehmonlarda katta taassurot qoldirdi. Sportchilarning jismoniy salohiyati, harakatlaridagi uyg‘unligi barchaga ko‘tarinki ruh ulashdi.

“Rektor kubogi” sport musobaqalari davom etmoqda. Ma’lum qilinishicha, g‘olib jamoalar qimmatbaho sovg‘alar bilan taqdirlanadi.

O‘zA