23-28 aprel kunlari Turkmanistoning Ashxobod shahrida «OMOUS-2023» xalqaro matematika olimpiadasi o‘tkazildi.

2020 yildan boshlab an’anaviy tarzda o‘tkazilayotgan musobaqada Samarqand davlat universiteti matematika fakulteti talabalari Davlat Kamoliddinov va Bobomurod Abdurahmonov munosib ishtirok etib, oliygoh sharafini himoya qildilar. 

Eron, AQSH, Rossiya, Meksika, Arabiston, Vengriya kabi 20 davlatdan 300 dan ziyod talaba qatnashgan olimpiada ikki turda, jumladan, yakka va jamoaviy tarzda o‘tkazilgan.  

SamDU axborot berishicha, yakka tartibda o‘tkazilgan bahslarda Davlat Kamoliddinov kumush medalni, Bobomurod Abdurahmonov esa bronza medalni qo‘lga kiritgan. Jamoaviy bahslarda esa universitet talabalari bronza medalga erishgan.  

Magistrant Davlat Kamoliddinov ushbu olimpiadada ishtirok etgan 46 nafar o‘zbekistonlik talabalar orasida eng yuqori natijani qayd etgani ham alohida e’tirofga loyiq.  

O‘zA