Самарқанд қаласында ТМД-ға мүше мемлекеттердің қауіпсіздік органдары мен барлау қызметтері басшыларының 21-отырысы өз жұмысын бастады.

Өзбекстанда алғаш рет өтіп жатқан бұл іс-шараға Әзербайжан, Армения, Беларусь, Қазақстан, Қырғызстан, Ресей, Тәжікстан, Түркіменстан және Өзбекстанның қауіпсіздік органдары мен барлау қызметтері басшылары қатысып отыр.

Алдымен, Өзбекстан Республикасының Президенті Шавкат Мирзиёевтің жиналыс қатысушыларына арналған үндеуін Президент жанындағы Қауіпсіздік кеңесінің хатшысы В. Махмудов оқып берді. Мемлекет басшысы өз үндеуінде бүгінде әлемдегі жаһандық геосаяси жағдайдың күрделеніп, дәстүрлі қауіп-қатерлердің күшейіп, жаңа сын-тегеуріндердің пайда болғанын атап өтіп, осындай жағдайда достастық елдерінің халықаралық және өңірлік қауіпсіздік мәселелері жөніндегі ұстанымдарын нығайту бұрынғыдан да маңызды екенін айтқан.

Іс-шара барысында қатысушылар қазіргі заманғы қауіптер мен қатерлер жөнінде пікір алмасып, ТМД елдерінің барлау қызметтері арасындағы ынтымақтастықты нығайтуға бағытталған кезекті міндеттерді талқылайды.

Кездесу соңында делегация басшылары аймақтық қауіпсіздікті қамтамасыз ету бойынша өзара іс-қимылдың нақты міндеттері мен басым бағыттарын айқындап алуы көзделген.

Ғ.Хасанов, А.Исроилов (сурет), ӨзА