Осы аптада әлем назары тағы да Самарқанға ауады. Шығыстың қақпасы атанған көне шаһарда «Орталық Азия – Еуропа Одағы» алғашқы саммит пен Халықаралық климат форумы өтеді.

Қазіргі таңда қалада халықаралық шараларға қызу дайындық жүріп жатыр. Самарқанның басты көшелері Орталық Азия елдері мен Еуропа Одағының жалаулары, сондай-ақ форум логотиптерімен безендірілген.

Форумға Өзбекстан, Қазақстан, Қырғызстан, Тәжікстан және Түркіменстан президенттері, Еуропа Одағы, БҰҰ, халықаралық қаржы институттары мен жетекші экологиялық ұйымдардың өкілдері, жалпы 80-нен астам елдің делегациялары қатысады деп күтілуде. Бұл — өңірдің «жасыл» трансформациясы мен тұрақты дамуына деген ортақ ұмтылыстың айқын дәлелі.

Айта кету керек, БҰҰ Бас Ассамблеясы Өзбекстанның бастамасы негізінде қабылдаған «Орталық Азиядағы экологиялық проблемалар: тұрақты даму және өркендеу жолында өңірлік бірлікті нығайту» резолюциясы бірауыздан мақұлданған. Онда Өзбекстан Президентінің бірқатар бастамалары, соның ішінде «Орталық Азия үшін жасыл күн тәртібі» мен оның тұрақты даму мақсаттарына қосар үлесі атап көрсетілген. Сонымен қатар Самарқанда халықаралық климат форумын өткізу идеясы да қолдау тапқан.

[gallery-22605]

Халықаралық іс-шараларды жоғары деңгейде өткізу әрі қауіпсіздікті қамтамасыз ету мақсатында 1–5 сәуір күндері Самарқанд қаласындағы жеті жоғары оқу орны мен төрт академиялық лицей мен техникумда қысқамерзімді демалыс жарияланды. Оқу үдерісі 2025 жылғы 7 сәуір, дүйсенбі күні қайта басталады. Сонымен бірге 3, 4 және 5 сәуір күндері облыс арқылы өтетін транзиттік көліктерге айналма бағыттар ұйымдастырылады.

суреттерді түсірген А.Исроилов, ӨзА